នៅព្រឹកថ្ងៃទី៨ ខែធ្នូ ឆ្នាំ២០២៥ ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា  និងជាប្រធានក្រុមសមាជិកព្រឹទ្ធសភាប្រចាំភូមិភាគទី២  បានដឹកនាំកិច្ចប្រជុំក្រុមសមាជិកព្រឹទ្ធសភាប្រចាំភូមិភាគទី២ ដោយមានការចូលរួមពីឯកឧត្តម លោកជំទាវ សមាជិក សមាជិកាព្រឹទ្ធសភាប្រចាំភូមិភាគទី២ (កំពង់ចាម និងត្បូងឃ្មុំ)ទីប្រឹក្សា ថ្នាក់ដឹកនាំ-សមាជិកខុទ្ទកាល័យ និងក្រុមការងារ ដើម្បីពិនិត្យ និងពិភាក្សាលើរបៀបវារៈចំនួន៥ រួមមាន៖
១.សភាពការណ៍ក្តៅនៅតាមព្រំដែនកម្ពុជា-ថៃ ដែលភាគីថៃបានបើកការវាយប្រហារមកលើកម្ពុជា បន្ទាប់ពីសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយដោយយោធាថៃ
២.ពិនិត្យរបាយការណ៍សកម្មភាពការងារប្រចាំឆ្នាំ២០២៥
៣.ពិនិត្យរបាយការណ៍ចំណូល-ចំណាយប្រចាំឆ្នាំ២០២៥
៤.ពិនិត្យ និងផែនការប្រតិបត្តិប្រចាំឆ្នាំ២០២៦
៥.បញ្ហាផ្សេងៗ ។

នៅលើគ្រប់របៀបវារៈ អង្គប្រជុំទទួលបានការចូលរួមមតិយ៉ាងផុសផុល និងអនុសាសន៍ដឹកនាំដ៏ខ្ពង់ខ្ពស់របស់ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ លើផែនការសកម្មភាពការងារបន្ទាប់។

ឆ្លៀតក្នុងឱកាសនេះ ឯកឧត្តមអនុប្រធានទី១ បានសម្តែងនូវការថ្លែងអំណរគុណ និងមោទនភាពជាតិខ្ពស់ចំពោះទឹកចិត្តស្នេហាជាតិ សាមគ្គីឯកភាពជាតិ ជាធ្លុងមួយ នៅគ្រប់ស្រទាប់សង្គមជាតិ ដែលបានគាំទ្រទាំងកម្លាំងកាយ ចិត្ត និងសម្ភារៈជួយដល់សមរភូមិមុខ ក្នុងការការពារទឹកដីមាតុភូមិកម្ពុជា វាយបំបាក់ឱ្យបរាជ័យរាល់ការប៉ុនប៉ងរំលោភបំពាន និងការចិញ្ចឹមមហិច្ឆតាឈ្លៀនពានរបស់ថៃ។

ខ្លឹមសារ៖ ខុទ្ទកាល័យឯកឧត្តមអនុប្រធានទី១ព្រឹទ្ធសភា
រូបភាព៖ នាយកដ្ឋានព័ត៌មាន